|
საქართველოს პარლამენტის თავმჯდომარის მოადგილემ, გიგი წერეთელმა გახსნა აშშ- საქართველოს ინფექციურ დაავადებათა კვლევის კონფერენცია, რომელიც აივ/შიდს-ის, ტუბერკულოზისა და ჰეპატიტების საკითხებს ეძღვნება. შეხვედრა თბილისში, სასტუმრო მარიოტში ტარდება. მასში მონაწილეობს 200-მდე მეცნიერი, მკვლევარი, პრაქტიკოსი ექიმი, მათ შორის გამოჩენილი სპეციალისტები აშშ-ის წამყვანი უნივერსიტეტებიდან.
მისასალმებელ სიტყვაში გიგი წერეთელმა აღნიშნა, თუ რა პრობლემას წარმოადგენს დღეს საქართველოსთვის აივ/შიდსი, ტუბერკულოზი და ჰეპატიტები, რა წარმატებები იქნა მიღწეული ბოლო წლებში, რაც განპირობებულია ქვეყანაში ამ პრობლემაზე მულტისექტორული თანამშრომლობის მაღალი დონით, სახელმწიფოს, დონორების, სპეციალისტების მიზანმიმართული ქმედებებით, რომლებიც განსაკუთრებით ფოკუსირებულია დაავადების პროფილაქტიკაზე და დროულ დიაგნოსტიკაზე, ისევე როგორც სრულყოფილ მკურნალობასა და პაციენტთა ფსიქო-სოციალურ რეაბილიტაციაზე. ამავე დროს ხაზი გაუსვა სირთულეებსა და ამოცანებს, რაც ამ სფეროში არსებობს. მან ასევე აღნიშნა, რომ უკანასკნელ პერიოდში ურთიერთანამშრომლობითი პროგრამების ფარგლებში 70-მდე მეცნიერი გადამზადდა ემორის, ნიუ-იორკის, ჯონს ჰოპკინსის უნივერსიტეტებში, სხვა სამეცნიერო ცენტრებში და ეს მნიშვნელოვანი წინ გადადგმული ნაბიჯია არა მხოლოდ აღნიშნულ დაავადებათა კვლევის გაუმჯობესებისთვის, არამედ მთლიანად ჯანდაცვის სისტემისათვის.
http://www.parliament.ge
2010.07.29
|
