ადრეული ასაკის (6 თვის ასაკიდან 2 წლამდე) ბავშვების რაციონი ზემოქმედებას ახდენს მათი ინტელექტის ფორმირებაზე. ასეთ დასკვნამდე მივიდნენ მეცნიერები ადელაიდას უნივერსიტეტიდან, რომლებმაც ჩაატარეს 7000 ბავშვის მასშტაბური კვლევა.

აღმოჩნდა, რომ ის ბავშვები, რომელთა მშობლებიც სიცოცხლის პირველი ორი წლის განმავლობაში რეგულარულად ანებივრებდნენ მათ საბავშვო ფასტ-ფუდით, როგორიცაა ორცხობილები, სხვადასხვა სახის ტკბილი სასმელები, ასევე შოკოლადები და ჩიფსები, 8 წლის ასაკში დაქვეითებული ინტელექტის კოეფიციენტით (IQ) გამოირჩეოდნენ იმ თანატოლებთან შედარებით, რომლებიც სწორად იკვებებოდნენ ანუ მიირთმევდნენ ჯანსაღ საკვებს.

სწორი კვება ნიშნავს საკმარისი რაოდენების ხილსა და ბოსტნეულს ყოველდღიურად (ჯანმო-ს მონაცემებით, დღეში 5 ულუფამდე). გარდა ამისა, IQ-ტესტირების დროს არადამაკმაყოფილებელი შედეგების დემონსტრირება მოახდინეს ასევე ხელოვნურ კვებაზე გაზრდილმა ბავშვებმა, რომლებსაც აძლევდნენ დიდი რაოდენობის შაქრის შემცველ ხელოვნურ ნარევებს.

ეს აიხსნება არა იმდენად შაქრის მავნე ზეგავლენით, არამედ იმ ფაქტორით, რომ არადაბალანსებული რაციონის დროს ტვინი საკმარისი რაოდენობით ვერ იღებს საჭირო ნივთიერებებს. ფასტ-ფუდი შედგება ე.წ. ”ცარიელი კალორიებისაგან”, სადაც ადგილი არ რჩება მიკროელემენტებისათვის, ფლავონოიდებისათვის და მსგავსი სასარგებლო ”ინგრედიენტებისათვის”, რომლებსაც დიდი რაოდენობით შეიცავს ნატურალური და მცენარეული საკვები.

მეცნიერები ადრეც ვარაუდობდნენ, რომ დაბალანსებული შემადგენლობის მქონე შინ დამზადებულ საკვები, განსხვავებით სამრეწველო წარმოების პროდუქტებისაგან და ფასტ-ფუდისაგან, კეთილისმყოფელ ზეგავლენას ახდენს ბავშვების ინტელექტუალურ დონეზე. თუმცა ეს მოსაზრება ასე თვალნათლივ პირველად დადასტურდა.

მიუხედავად იმისა, რომ რვა წლის ასაკის ”სიტკბოს მოყვარული” ბავშვების ჩამორჩენა IQ-ს მიხედვით მათივე თანატოლებისაგან არც თუ ისე გამოხატული იყო (საქმე ეხებოდა მხოლოდ რამდენიმე პუნქტს), მეცნიერები არ გამორიცხავენ იმას, რომ ეს განსხვავება ასაკის მატებასთან ერთად გაიზრდება.