აღმოჩნდა, რომ გულ-სისხლძარღვთა დაავადებების განვითარების რისკი შეიძლება სისხლის ჯგუფზე იყოს დამოკიდებული. განსაკუთრებული საშიშროების წინაშე იმყოფებიან მეორე, მესამე და მეოთხე ჯგუფის მქონე პირები. ასეთია ამერიკის კარდიოლოგთა ასოციაციის მიერ ჩატარებული კვლევის შედეგები.

ყველაზე მეტი რისკის ქვეშ იმყოფებიან ყველაზე იშვიათი - მეოთხე ჯგუფის სისხლის მქონე ადამიანები. ამ შემთხვევაში რისკთან შესაბამისობა 23%-ია. მესამე ჯგუფის სისხლის შემთხვევაში - 11%-ია, ხოლო მეორე ჯგუფის დროს - 5%. კვლევის ხელმძღვანელის ჰარვარდის საზოგადოებრივი მეცნიერების სკოლის პროფესორის ლუ კის აზრით, ყველა ადამიანმა უნდა იცოდეს საკუთარი სისხლის ჯგუფი და დაავადებების განვითარების ალბათობაც.

რისკების გამოთვლა შესაძლებელი გახდა 20 წლის განმავლობაში 30-75 წლის 90 000-მდე ადამიანის სამედიცინო მონაცემების ანალიზის წყალობით. სისხლის ჯგუფის გარდა ყურადღება ექცეოდა კვების რაციონს, ასაკს, წონას, სქესს, ეთნიკურ კუთვნილებას, მავნე ჩვევებს, თანმხლებ დაავადებებს.

მეცნიერებს არ შეუძლიათ ზუსტად ახსნან, თუ რატომ არის სისხლის განსაზღვრული ჯგუფები კავშირში გულის დაავადებების მომატებულ რისკთან, მაგრამ ცნობილია, რომ მეორე ჯგუფის სისხლი გარკვეულ კავშირშია დაბალი სიმკვრივის ლიპოპროტეინის (ე.წ. ”ცუდი ქოლესტერინის”) გამომუშავებასთან, ხოლო მეოთხე ჯგუფის სისხლი - ანთებით პროცესებთან, რაც ზეგავლენას ახდენს სისხლძარღვებზე. პირველი ჯგუფის სისხლის მქონე ადამიანებს შეიძლება ქონდეთ იმ ნივთიერების მომატებული კონცენტრაცია, რომელიც აუცილებელია სისხლის შედედებისა და სისხლის ნორმალური მიმოქცევისათვის.